കൊച്ചി: സംസ്ഥാനത്തെ ടൂറിസം പ്രവര്ത്തനങ്ങള്ക്കും ടൂറിസം വ്യവസായത്തിനും കൂടുതല് ഉണര്വേകി 13-ാമത് കേരള ട്രാവല് മാര്ട്ടിന് (കെടിഎം 2026) കൊച്ചിയില് സമാപനം. ടൂറിസം വ്യവസായത്തിന്റെ വളര്ച്ചയ്ക്കു സഹായകമായ ബയേഴ്സ്-സെല്ലേഴ്സ് കൂടിക്കാഴ്ചകളാലും ടൂറിസം പുരോഗതിക്ക് ഉതകുന്ന ഫലപ്രദമായ ചര്ച്ചകള് കൊണ്ടും സമ്പന്നമായിരുന്നു നാലു ദിവസത്തെ ട്രാവല് മാര്ട്ട്.
ആകെ 58,000 ബിസിനസ് കൂടിക്കാഴ്ചകളാണു നടന്നത്. വിനോദസഞ്ചാര മേഖലയില് നിർമിതബുദ്ധി വലിയ മാറ്റങ്ങള് കൊണ്ടുവരുന്നുണ്ടെങ്കിലും സഞ്ചാരികളുടെ മനസറിഞ്ഞുള്ള യാത്രാനുഭവങ്ങള് നല്കാന് മനുഷ്യ ഇടപെടലുകളിലൂടെ മാത്രമേ സാധിക്കൂവെന്ന് സമ്മേളനം അഭിപ്രായപ്പെട്ടു.
സമാപനസമ്മേളനം ടൂറിസം അഡീഷണല് ഡയറക്ടര് സുമിത് കുമാര് ഠാക്കൂര് ഉദ്ഘാടനം ചെയ്തു. കെടിഎം പ്രസിഡന്റ് ജോസ് പ്രദീപ് അധ്യക്ഷത വഹിച്ചു.
ഇന്ത്യ ടൂറിസം അസി. ഡയറക്ടര് എസ്. പദ്മാവതി, കെടിഎം സെക്രട്ടറി എസ്. സ്വാമിനാഥന്, മുന് കെടിഎം പ്രസിഡന്റുമാരായ ജോസ് ഡൊമിനിക്, ഇ.എം. നജീബ്, ബേബി മാത്യു, റിയാസ് അഹമ്മദ്, ഏബ്രഹാം ജോര്ജ്, കെടിഎം ജോയിന്റ് സെക്രട്ടറി ജോബിന് ജോസഫ്, വൈസ് പ്രസിഡന്റ് സി. ഹരികുമാര്, ട്രഷറര് ജിബ്രാന് ആസിഫ്, സിഇഒ എസ്. രാജ്കുമാര് തുടങ്ങിയവര് സംബന്ധിച്ചു.
കെടിഎം 2026ന്റെ ഭാഗമായി വാട്ടര് മെട്രോ
കേരള ട്രാവല് മാര്ട്ടിന്റെ (കെടിഎം 2026) ഭാഗമായി കൊച്ചി വാട്ടര് മെട്രോ. ബോള്ഗാട്ടി, മറൈന്ഡ്രൈവ് എന്നിവിടങ്ങളിലെ ഹോട്ടലുകളില്നിന്ന് കെടിഎം വേദിയായ വെല്ലിംഗ്ടണ് ഐലൻഡിലേക്ക് പ്രതിനിധികള്ക്കു യാത്രാസൗകര്യം ഒരുക്കിയാണ് വാട്ടര് മെട്രോ കെടിഎമ്മിന്റെ ഭാഗമായത്. അതുവഴി മറ്റു സംസ്ഥാനങ്ങളില് നിന്നും വിദേശ രാജ്യങ്ങളില്നിന്നുമുള്ള കെടിഎം ബയേഴ്സിന് കൊച്ചിയിലെ ജലപാതകള് പരിചയപ്പെടാനും ആസ്വദിക്കാനുമുള്ള അവസരവും കൈവന്നു.
കൊച്ചിയുടെ വിനോദസഞ്ചാര ഗതാഗത സംവിധാനങ്ങളുടെ ഭാഗമായി വാട്ടര് മെട്രോയെ അവതരിപ്പിക്കുക എന്ന ലക്ഷ്യത്തോടെ ഇത്തവണ കെടിഎമ്മിന്റെ ആസൂത്രണ ഘട്ടത്തില്ത്തന്നെ ഈ ആശയം പരിഗണിച്ചിരുന്നതായി കെടിഎം പ്രസിഡന്റ് ജോസ് പ്രദീപ് പറഞ്ഞു.
ബോള്ഗാട്ടി, മറൈന്ഡ്രൈവ് എന്നിവിടങ്ങളിലെ ഹോട്ടലുകളില്നിന്ന് റോഡ് മാര്ഗം വെല്ലിംഗ്ടണ് ഐലൻഡിലെ വേദിയിലെത്താന് ഏറെ സമയമെടുക്കും.എന്നാല് വാട്ടര്മെട്രോ വഴി ഏകദേശം അര മണിക്കൂറിനുള്ളില് എത്താനായി. ഒപ്പം കൊച്ചിയുടെ കായല്ഭംഗി ആസ്വദിക്കാനുള്ള അവസരവും അവര്ക്കു ലഭിച്ചുവെന്നും അദ്ദേഹം പറഞ്ഞു. ബോട്ട് സര്വീസ് കെടിഎം 2026ന്റെ ഭാഗമാക്കാന് സംഘാടകര് വാട്ടര് മെട്രോ അധികൃതരെ സമീപിക്കുകയായിരുന്നു. ജില്ലാ കളക്ടറുടെ ഇടപെടലിലൂടെ ന്യായമായ നിരക്കില് ഈ സേവനം ക്രമീകരിക്കാനായി.
ബയേഴ്സില്നിന്നു മികച്ച പ്രതികരണമാണ് ജലയാത്രാ അനുഭവത്തിനു ലഭിച്ചത്. കൊച്ചിയിലെ വാട്ടര് മെട്രോ മികച്ചതാണെന്നും വീണ്ടും അതില് യാത്ര ചെയ്യാന് ആഗ്രഹിക്കുന്നുവെന്നും അവര് പ്രതികരിച്ചു.
Deepika
E-paper LOGIN
LOGIN
